Telepon Tukang Tipu
Lamun aya
télépon nyasar, entong teuing dihaminan kalayan serieus. Bisi matak jantungeun
atawa nyilakakeun. Ieu kajadian kaalaman ku kuring dua taun katukang. Harita
budak anu cikal kakara kelas tilu SD, ari anu panengah masih di TK.
Harita kuring
kakara balik ti TK, kira-kira tabuh dalapanan. Asupna mah budak téh tabuh
tujuh. Tapi tas nganteur téh sok terus ngadon ngagosip jeung ibu-ibu anu sarua
ngalanteur budakna. Kitu ogé bari nungguan si Mang Sayur. Geus milihan sayuran
mah sok terus gura-giru mulang, masak keur nyampakeun budak da tabuh sapuluh gé
geus mulang deui.
Ari si cikal mah
tara dianteur deui. Keur mah sakolana deukeut, masih di jero kompleks, budakna
ogé geus embung diaanteur.
Kira-kira tabuh
salapanan télépon imah ngirining. Barang diangkat mani matak ratug jajantung.
“Ini dengan Ibu
Herlina?” cenah ku basa Indonesia. Sorana asa henteu wawuh.
“Iya betul,”
nembal téh ku basa Indonesia ogé. “Ada apa ya?”
“Aduh maaf Bu
baru memberi tahu sekarang. Anak Ibu kecelakaan di sekolah, sekarang di rumah
sakit.”
Puguh waé
reuwasna mah. Mani ngadegdeg nanya deui téh, “Anak yang mana ya?”
“Aduh Bu
neranginnya nanti saja. Anak Ibu harus segera dioperasi. Ibu transfer saja dulu
uang. Saya tunggu sekarang juga!”
Ngalenyap anu kadua kalina ngadéngéna. Tapi
bari atoh. Dina haté gedé sangkaan, ieu jelema arék nipu. Geuning ditanya
sakola budak mah henteu ngajawab, hartina henteu nyahoeun sakola budak kuring.
Cenah arék operasi, da operasi mah aya prosedurna, kudu aya persetujuan kulawarga.
Atawa persetujuan saha waé anu nganteur, tapi henteu aya hubunganna jeung
babayar. Apan kuring téh kieu-kieu ogé lulusan Akper, kungsi gawé di rumah
sakit deuih.
“Transfer buat
apa?” nanya téh tambah henteu engap wungkul ayeuna mah.
“Ibu tuh gimana,
ya buat biaya operasi! Ini catat Bu nomor rekeningnya. 008023....”
“Gampang kalau
transfer, anak saya yang sekolah dimana?”
“Ibu tidak
sayang anak, ya?”
“Kamu yang tidak
sayang anak, nyari makan dari nipu orang!”
Meureun manéhna
reuwaseun. Da terus téléponna téh ditutup. Basa guru di sakolah ditélépon, enya
wé barudak kuring mah araya keur dialajar. Alhamdulillah Gusti, tos digeuing
tina kajahatan tukang tipu. @@@
PPM TAMU ku: Lina Herlina
Mangle no 2511, 22-28 Januari 2015
0 Response to "Telepon Tukang Tipu"
Posting Komentar