SIM Telat
Indit ka Bandung téh tara ngitung waktu. Jam sabaraha ogé
bisa indit. Henteu siga babaturan lamun indit osok ngahaja isuk-isuk atawa
nyubuh, balikna nungguan burit. Cenah da sieun katéwak ku operasi pulisi. Éta
da manéhna mah henteu boga SIM. Ari kuring, SIM aya, motor henteu dikua-kieu
siga barudak. Jadi indit téh bisa tenang, henteu sieun ditilang.
Ari pangalaman jeung pulisi,
maksud téh jeung oknum pulisi, henteu ngan sakali. Kungsi dipegat pulisi anu
ngajleng tina tangkal kai di jalan Pramuka, kungsi paréa-réa omong jeung pulisi
anu keukeuh ménta duit. Éta gening aya ogé oknum pulisi anu keukeuh ménta duit.
Ari kuring, naon waé kasalahan, daripada méré duit kajeun teuing ditilang.
Anu arék didongéngkeun basa
keur ngopi bari ngobrol jeung babaturan di warung sisi jalan. Ngobrol téh ka
ditu ka dieu henteu puguh alang-ujurna.
Bras kana obrolan ngeunaan SIM. Sanggeus ngabahas carana memperpanjang SIM,
nyieun SIM anyar, jeung duka naon deui, tuluy silihtémbongkeun SIM.
“Gening SIM anu manéh ogé geus
béak. Kudu nyieu anyar atuh telat kieu mah,” ceuk babaturan.
Kuring tangtu waé reuwas.
Rarasaan téh taun hareup béak SIM teh. Babaturan anu séjén milu nempoan SIM. “Ludeungan
manéh mah euy, sakitu SIM béak, ti minggu kamari indit ka Bandung téh
pabeubeurang,” ceuk anu saurang bari mikeun SIM ka kuring.
Kuring
nampanan, tuluy ngabulak-balik SIM. Enya waé SIM téh geus genap bulan béak. Reuwas
téh jadi ngahuleng sabada inget, salila genep bulan ieu henteu sakali apan
dipegat ku pulisi. Anu inget waé, ti bulan kamari, aya kana opat kalina.
“Anu uing
héran, apan mindeng dipegat operasi pulisi téh. Tapi pulisi ogé henteu maca
taun berlaku meureun nya,” pok téh.
“Eta sugan
manéh ngomong naon lamun dipegat?”
“Tara
nanaon, paling ogé: Mangga, ieu SIM ieu STNK.”
“Meureun
lantaran tenang, pulisi henteu nyangka SIM manéh geus béak.”
“Sigana
kitu.”
Sanggeus
kanyahoan mah SIM béak, rék indit ka Bandung téh jadi asa-asa. Ongkoh apan
ayeuna téh keur usum operasi pulisi. @@@
Mangle no 2637, 20-26 Juli 2017
0 Response to "SIM Telat"
Posting Komentar