Basa Malaikat Bingung
Jaman nabi Sulaeman a.s. aya saurang priyayi anu reuwas. Sababna, basa éta priyayi nuju ngariung suka-seuri ngawangkong ngalér-ngidul jeung sobat-sobatna, manéhna ningali malaikat Izroil dina riungan. Katingalina mah malaikat Izroil téh siga anu bingung. Tapi enya ogé siga anu bingung, éta priyayi reuwas kacida. Apan malaikat Izroil téh tugasna purah nyabut nyawa. Mangkaning anu bisa ningali malaikat Izroil téh ngan manéhna. Da sobat-sobatna mah geuning haré-haré waé.
Lantaran
reuwas téa, éta priyayi téh langsung ngahadep ka nabi Sulaeman a.s.
“Ya
Nabiyullah, abdi téh reuwas kacida. Margi tadi basa nuju ngariung sareng
sobat-sobat, abdi ningali malaikat Izroil aya dina riungan,” ceuk éta priyayi
téh. “Katingalina mah nuju bingung malaikat Izroil téh. Tapi enya ogé nuju
bingung, abdi mah angger reuwas. Uninga nyalira apan naon tugasna malaikat
Izroil.“
“Naha
reuwas sagala? Kuduna mah sujud sukur. Bisa ningali malaikat Izroil saméméh
ngalaksanakeun tugasna téh hiji anugrah ti Alloh SWT,” saur nabi Sulaeman.
Tapi
si priyayi téh kalah ngahuleng. Pokna téh: “Leres ari kituna mah. Tapi abdi téh
émut kasauran Salira kapungkur
waktos
nyarengan Salira perang ngalawan musuh anu gangas. Sabada perang téh apan Salira
nyarios; pok sebutkeun, ménta naon waé ogé bakal ditedunan.”
Nabi
Sulaeman imut, teu lami ngawaler: “Enya, enya pisan Kaula kungsi jangji kitu. Harita
mah apan Anjeun henteu ménta nanaon.”
“Kumargi
éta ayeuna abdi ngahadep. Abdi nyungkeun ayeuna Salira miwarang angin puyuh
pikeun nyandak abdi ka tanah India.”
Nabi
Sulaeman ngahuleng ngaragameneng. India téh apan tempatna jauh, béda pulo béda
nagara. Nabi Sulaeman mah apan nyakrawati di Yerusalem, sedeng India
dipisahkeunana ogé ku nagara-nagara Timur Tengah jeung Lautan India.
Saatos
sababaraha lami ngémut, nabi Sulaeman nyarios: “Kieu, Sobat. Urang téh geus
ngaliwatan réa karuwetan, ngabarkeun pedang dina réa peperangan. Anjeun ogé
apan nyaksian, ratusan malah rébuan syuhada gugur di danalaga. Anu tadina gagah
rongkah, rosa tanaga paséhat maén silat, ngan sakolébat pedang bisa ngudupruk
teu walakaya. Hartina, tali anu ngabeungkeut urang jeung dunya téh uduh. Henteu
kudu disieun-sieun, da kitu titis-tulisna anu hirup.”
Si
priyayi téh sakedapan mah ngaregepkeun. Tapi kalah pokna téh: “Muhun, leres
pisan ari kituna mah. Tapi abdi téh émut waé kana jangji Salira. Apan Salira
téh raja anu ogé nabi. Atuh maenya teuing raja anu ogé nabi kedah ingkar tina
jangji.”
“Ari
kitu onaman heug téh teuing. Ayeun kénéh kaula bakal maréntahkeun ka angin
puyuh sangkan mawa Anjeun ka India.”
Sapangeusi
karaton raja Sulaeman reuwas basa aya angin lilimbungan asup ngaliwatan gapura
jeung jandéla-jandéla. Tapi ngan sakilat éta angin téh hiber deui kaluar
karaton bari mawa si priyayi ka India.
Kacaturkeun
nabi Sulaeman a.s. ogé saenyana ngaraos hémeng. Hémeng pédah émut kasauran si
priyayi tadi anu cenah malaikat Izroil téh sapertos anu bingung. Atuh Anjeunna
énggal ngulem Malaikat Maut, ngucapkeun salam, sareng énggal naros.
“Wahéy
Malaikat Alloh, kunaon katingali téh bet sapertos anu bingung?”
“Disebat
bingung memang sapertos kitu ya, Nabiyulloh,” saur malaikat Izroil. “Kami téh
diparéntahkeun pikeun nyabut nyawa tina ragana, di India tempatna. Tapi basa
Kami ngaliwat ka dieu, jalma anu bakal dicabut nyawana téh bet aya di dieu.
Apan ti dieu ka India téh sakitu tebihna. Upama éta jalma tumpak kuda anu
pangtarikna, asa moal nepi téréh-téréh. Sedeng waktu pikeun nyabut nyawa téh
ayeuna, sababaraha menit deui.”
“Upami
kitu mah entong bingung deui, da upami tos titis-tulisna nya pasti kedah kitu.
Jalma anu umurna ngan sababaraha menit deui téh da enya tos aya di India.
Mangga, ayeuna mah geura ka India waé.” (Yosep – Sumedang) @@@
RENGSE
0 Response to "Basa Malaikat Bingung"
Posting Komentar