CITA-CITA
Hiji poé, si
cikal anu kakara asup ka SMU, ujug-ujug ngabuih waé ngadongéngkeun cita-citana.
Cenah hayang jadi dokter forénsik. Tangtu waé
salaku indungna mah kuring atoh. Sugan enya, ari pok ti manéhna mah,
meureun diajarna ogé enya-enya.
“Dokter forensik
mah hebat nya, Nda. Geuning sagala terang tentang anatomi tubuh jalmi. Lamun
aya anu sakit, atawa maot ogé, ku naon maotna, anggota tubuh mana anu reksak,
tiasa kapendak ku dokter forensik mah,” ceuk budak téh.
Sangkaan kuring,
budak téh kungsi maca buku-buku tentang kesehatan atawa biologi. Atoh téh apan
éta téh cita-cita kuring baheula, hayang jadi dokter. Tapi malah méngkol jadi
perawat. Leuwih méngkol deui sabada rumah tangga, jadi perawatna di rumah sakit
mah ngan sababaraha taun. Terusna mah geuning kalah tulas-tulis ketak-ketik
siga kieu. Enya ogé pengetahuan ngeunaan kaséhatan mah henteu leungit, malah
kalah aya kawajiban pikeun nambahan terus-terusan. Enya, apan lamun nulis
artikel atawa buku kesehatan mah perlu deui macaan reperensi baheula atawa pengetahuan
populer anu leuwih anyar.
“Atoh wé Unda
mah Tétéh gaduh cita-cita janten dokter forensik. Tapi janten dokter naon waé
ogé hébat. Anu jelas mah, kedah nyaan diajarna. Saingan ka kedokteran mah pastina
ketat,” ceuk kuring. “Mudah-mudahan lancar biayana. Tétéh ogé belajarna
langkung soson-soson.”
Dina haté mah
enya hayang pisan boga budak anu jadi dokter. Matakna kuring jeung si Akangna satékah
polah ngusahakeun pikeun biayana. Hiji waktu mah basa keur milihan buku
referensi di toko buku onlén, ningali buku Dunia Forénsik, bet inget kana
cita-cita budak. Ah, dipesen wé buku téh meungpeung aya diskon deui.
Sababaraha poé
ogé buku pesenan téh datang. Buku Dunia Forensik mah disimpen di kamar si
cikal.
“Téh, tuh
dipangmésérkeun buku Dunia Forensik. Baca heula geura, naon waé anu disebat
forénsik téh,” ceuk kuring basa si Tétéh mulang sakola.
Budak téh henteu
muru ka kamarna saperti biasa lamun dipangmeulikeun buku novel. Tapi kalah
nyampeurkeun.
“Cita-citana ogé
tos gentos da ayeuna mah. Tétéh asa hoyong janten jaksa. Hébat geuning jaksa
téh,” cenah teu kireum-kireum.
Kuring molohok. Mimiti
jadi curiga. Pastina lain cita-cita senyana atuh ieu mah.
“Tétéh terang ti
mana tentang forénsik sareng jaksa?”
“Tina drakor.”
Kuring beuki
molohok. Ah, si Akangna anu kitu mah. Budak dimeunangkeun lalajo drakor da
cenah drakor mah aralus. @@@
Mangle no 2743, 15-21 Agustus 2019
0 Response to "CITA-CITA"
Posting Komentar