Si Kabayan Milih Persiden
Bagja Si Kabayan mah. Basa
batur salemburna, batur sadésana, batur sakabupaténna, batur saprovinsina,
batur sanagarana, hog-hag madungdengkeun calon presidén anu bakal dipilih, manéhna
mah teu milu riweuh.
Enya, apan cenah lantaran
béda pilihan presidén, réa kajadian anu matak hélok bin teu kaharti. Aya sobat
dalit jadi teu patanya-tanya acan, kolot anu ngusir budakna, nepi ka salaki-pamajikan
anu misah saré (duka nepi ka iraha...). Malah di Madura mah aya anu galungan
sagala nepi ka anu saurang ngababatang anu saurang deui dibui. Beu!
Ari Si Kabayan, tara
pirajeunan milu hog-hag di warung kopi atawa di garduh ronda. Minangka manéhna
ogé miluan kana karaméan pésta démokrasi
nagara, lamun aya pembagian sembako haratis ti bobotoh atawa calon presiden
atawa wakil presidén anu datang.
“Sembako sapelastik badag
ieu téh minangka kanyaah ti Calon Nomor Hiji. Tuh, kakara calon ogé apan geus
katingali nyaahna ka rahayat,” ceuk bobotoh alias tim suksés anu jadi jubir
alias juru bicara. “Jadi ulah hilap....”
“Coblos...!” témbal Si
Kabayan semu ngagorowok.
“Nomor hiji!” ceuk jubir
ngagorowok. “Hébat Si Emang. Tah, hadiahna sembako sapelastik deui!”
Dina waktu séjén Si Kabayan
ngahadiran basa calon presidén nomor dua datang. Lain ngadukung Si Kabayan mah,
da datangna sotéh pedah aya béja bakal dibagi roda pikeun usaha.
“Alhamdulilah, urang kudu
syukuran ka Gusti, réhna ayeuna aya calon presidén ti pangusaha ngora! Kumargi
kitu, ngamajukeun nagara téh henteu saukur pencitraan. Tapi nyaan-nyaan jeung
prakna,” ceuk jubir ti calon nomer dua. “Tah, ieu roda anu bakal dibagikeun téh
pikeun ngaberdayakeun masarakat ngarah jadi pengusaha. Emang anu kaimpleng jadi
pengusaha naon?”
“Jual-beli!” ceuk Si
Kabayan rikat ngagorowok.
“Hebat! Hébat pisan!
Jual-beli alias dagang téh lapangan kerja anu massiiiihhh lega. Sok didaftar Si
Emang éta tah kabagéan roda.”
Balikna Si Kabayan
ngadodorong roda bari sura-seuri. Tapi geuning lain didorong ka imahna rodana
téh, tapi kalah dibawa ka pasar. Dijual ka tukang hayam krispi 700 rébu. Tuluy
Si Kabayan meuli béas, lauk asin, sambeleun, peuteuy, pindang, sendal capit da
anu panimu geus pegat, baju waé keur Si Iteung. Balikna ogé tumpak ojég.
“Uing mah teu ngabohong,
Teung. Ditanya keur naon éta roda, keur jual-beli. Ngajual roda meuli sagalana,
tah geura asakan ieu beuteung asa geus ngurubuk ti tadi,” ceuk Si Kabayan
sabada nepi ka imah.
Kitu minangka ilu-biungna
Si Kabayan kana raména “taun politik” téh. Sahéngna anu hog-hag dina média
sosial, télévisi, koran, radio, intérnét, sama-sakali teu karasa ku Si Kabayan
mah. Enya apan manéhna mah tong boro hp android, teu boga radio-radio butut
acan.
Kakara Si Kabayan ngarasa
riweuh basa poéan Pemilihan Presidén jeung Legislatif lumangsung. Pukul salapan
isuk-isuk, mangsana haneut moyan, Si Kabayan indit ka TPS. Dipegat ku Kang Karma
sabalad-balad anu keur ngariung di sisi jalan.
“Kabayan, ulah poho nyoblos
nomer hiji,” ceuk Kang Karma.
“Naha uing kudu nyoblos
nomer hiji?” Si Kabayan can pati ngarti.
“Nomer hiji mah programna
hadé. Apan program Dana Desa anu ngawur-ngawur duit ka padésaan téh jasana
nomer hiji.”
“Gening diawur-awur téh teu
nepi ka imah uing mah.”
“Eh, tingali atuh jalan
jadi aralus. Apan manéh gé kabagéan gawé basa ngadegkeun pos linmas.”
“Ah, ngan diburuhan tilu
puluh rébu sapoé. Mending ngaladén ngaréhab imah Haji Entang, sapoé saratus
rébu.”
Kang Karma gagaro teu
ateul. Teu ngomong deui basa Si Kabayan ngaléos.
“Kabayan, ulah poho nyoblos
nomer dua,” ceuk Pa Asip nu keur ngariung jeung balad-baladna.
“Naha?”
“Nomer dua mah jagoan,
super héro ceuk jaman milénial mah, bakal aman.”
“Ah, lain aman. Sok kalah
pikasieuneun aya anu kitu téh.”
Pa Asip ngabetem. Si
Kabayan ngaléos deui. Nepi ka TPS manéhna ngahuleng. Bingung. Jadi milih saha?
Rét ka Bu Iroh anu jadi Ketua TPS. Gamuleng meunang disinjang, biwir beureum
saulas. Randa bageur. Sabada dikantun maot carogéna opat taun katukang téh acan
begér deui. Enya ogé lalagasan tara aya anu wani ngaheureuyan, komo
nyapirakeun.
“Bu Iroh, abdi mah lieur,
moal nyoblos nomer hiji atawa nomer dua,” ceuk Si Kabayan ngaharéwos. “Abdi mah
badé nyoblos Ibu waé.”
Bu Iroh ngarénjag. “Naon
siah, Kabayan? Kurang ajar, bangkawarah!” ceuk Bu Iroh bari ngalaan selopna. Si
Kabayan reuwas. Terus ngabecir da Bu Iroh ngamang-ngamang selop kaina. TPS anu
tadi jempling téh jadi ramé da anu paudag-udag disarurakan. ***
0 Response to "Si Kabayan Milih Persiden"
Posting Komentar